Орус элинин улуу жазуучусу Максим Горький биздин эртеңки келечегибиз болгон балдар туурасында “Балдар – жер шарынын жандуу гүлдөрү” деген таамай  аныктамасын берген экен. 1-июнь – Балдарды коргоонун эл аралык күнүнө карата Жалал-Абад облусунда бир катар максаттуу иш-чаралар аткарылды. Бул туурасында ыйгарым укуктуу өкүлдүн басма сөз катчысы билдирди.

КР Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев өзүнүн резервдик фондунан 90 миң сом акча каражатын облустун аймагындагы балдар үйлөрүнө материалдык колдоо көрсөтүү максатында даректүү түрдө которуп берди.

Тактап айтканда, Жалал-Абад шаарындагы психонервологиялык балдар үй-интернатына, Ноокен районундагы Ж.Ниязов атындагы атайын көмөкчү мектебине, Жалал-Абад облустар аралык ден соолукту калыбына келтирүүчү “Бакыт” борборуна, Сузак районунун Октябрь айылындагы Ж. Бөкөмбаев атындагы балдар үйүнүн ар бирине 20 миң сомдон жана Жалал-Абад облусундагы “Ак жол” балдар үчүн комплекстүү реаблитациялык борборуна 10 миң сом ыйгарым укуктуу өкүлдүн өздүк фондунан которулуп берилди.

- Жалал-Абад облустук мекеме-уюмдардын эмгек жамааттарынын бардык жетекчилери 1-июнь – Балдарды коргоонун эл аралык күнүнө карата кайсыл балдар үйлөрүнө жардам көрсөтүүлөрү керек экендиги конкреттүү көрсөтүлдү. Биздин максат – балдарыбызды эл аралык күнү гана эстебестен жыл ичинде шефтик жардам көрсөтүү жагын жөнгө салуу болуп саналат. Учурда Жалал-Абад облусу боюнча 9013 жарым жетим, 480  толук томолой жетим балдар бар. Мындан сырткары облус аймагы боюнча 28 945 ден соолугунан мүмкүчүлүгү чектелген адамдар бар,- деди ыйгарым укуктуу өкүлдүн аппаратынын социалдык өнүктүрүү жана мониторинг бөлүмүнүн башкы адиси Абдиллабек Камбаров.

 Жолдошбай Осмонов, Жалал-Абад облусу