Жалал-Абад облус аймагында 468 орто мектепте “Акыркы коңгуроо” аземи өтүп, баарына Ички иштер органдарынын кызматкерлеринин катышуусу менен бирге түшүндүрүү иш-чараларын жүргүзүштү. Бул тууралуу Жалал-Абад ОИИБнын басма сөз кызматы билдиди.

Алынган маалыматка караганда, ошондой эле Жалал-Абад милициясы мектеп окуучулары үчүн “Ар бир кесип ардактуу” аталыштагы кесипке багыт берүүчү ар кандай иш-чараларды жана спорттук мелдештерди да өткөзүүдө.

Жалал-Абад ОИИБнын орун басары Ибрагим Шатманалиев 27-майда Жалал-Абад шаарындагы №5 Б.Осмонов атындагы орто мектебинде болуп, милиция менен тыгыз кызматташып коомдук тартипти камсыздоодо жана үлгүлүү жетишкендиктери менен өзгөчөлөнгөн мугалимдерге жана окуучуларга Жалал-Абад ОИИБнын ардак баракчаларын тартуулашты.

- Жылда биз “Мекеним менин Кыргызстан” долбоору алкагында окуучулар жана жаш өспүрүмдөр арасында профилактикалык багыттагы жаштарды достукка, ынтымакка, улуттар аралык биримдикке чакырган, мекенчилдик сезимдерге тарбиялаган көп иш-чараларды уюштуруп келүүдөбүз. Бүгүн дагы биз баардык жерде ошондой иш-чаралардын активдүү катышуучуларын мектепти эң жакшы ийгиликтер менен аяктап жатышкан окуучуларды башкармалыктын грамоталары менен сыйлап ыраазычылыктарыбызды айтабыз. Ушундай окуучулар мына ушул №5 Б.Осмонов мектебинин окуучулары арасында да бар. Биз аларга да чоң ыраазычылыктарды айтуу менен жалпы бүтүрүүчүлөргө келечек жашоолорундагы мыкты ийгиликтерге жетишүүгө тилектешбиз, - деп билдирди И.Шатманалиев.

Айта кетүүчү жагдай, учурда жашы жете элек өспүрүмдөр менен иштөө инспекторлору жана жол кайгуул кызматы менен атайын рейддер да өткөзүлүүдө жана бир ай бою уланат.