Жалал-Абад шаарындагы Сатыбалды Давлетов атындагы №14 мектеп-лицейинде акыркы коңгуроо салтанаты белгиленди. Ага Жалал-Абад шаарынын социалдык маселелер боюнча вице-мэри Турдалы Темирбаев, КР өкмөтүнүн Жалал-Абад облусундагы ыйгарым укуктуу өкүлүнүн орун басары Бактыбек Анаркулов, Жалал-Абад шаардык билим берүү башкармалыгынын башчысы жана башка жетекчилер катышышты.

Жалал-Абад шаарынын социалдык маселелер боюнча вице-мэри Турдалы Темирбаев бүтүрүүчүлөрдү бүгүнкү майрамдары менен куттуктады.

- Алгач тамга тааныбай келген мотурайган наристелер элеңер. Мына бүгүн мектепти бүтүрүп жатасыңар. Убакыт деген учкан куш экен. Сабаттуу адамдар өлкөнүн өнүгүшүнө эбегейсиз салымдарды кошушат. Мен ойлойм силер да өзүңөр сүйгөн кесиптин ээси болуп, өлкөбүзгө салым кошосуңар. Жолуңар шыдыр болсун урматтуу бүтүрүүчүлөр, -деди Т. Темирбаев.

Майрамдык салтанатта Республикалык олимпиадага катышып, алдыңкы орундарды алган окуучуларга жана ошол окуучуларды даярдаган мугалимдерине Жалал-Абад шаардык мэриясы тарабынан ардак грамоталар тапшырылды.