Бүгүн, 26-майда Жалал-Абад шаарында “Тарых жана Маданият” жылына, Кыргыз Республикасы менен АКШнын ортосундагы мамилелердин 25 жылдыгына, 27-май - Китепкана күнүнө жана облустук китепкананын 90 жылдыгына карата “Китеп кербени” аттуу акция өткөрүлүп жатат. Бул тууралуу маалыматты Жалал-Абад областтык китепканасынын жетекчиси Сейилкан Аталиева билдирди.

Анын айтымында, бул иш-чара Жалал-Абад облустук китепканасы жана Америка ордосу тарабынан, АКШ нын Кыргызстандагы элчилигинин, “Кыргыз-китеп” мамлекеттик ишканасынын, USAIDдин “Бирге окуйбуз” долбоорлорунун демөөрчүлүк колдоосу менен өткөрүлүүдө.

- Бүгүнкү өткөрүлүп жаткан иш-чарага жети облусубуздан коноктор келип катышууда. Ошондой эле, КР Маданият, маалымат жана туризм министрлигинин, АКШнын Кыргызстандагы элчилигинин өкүлдөрү, “Кыргыз китеп” мамлекеттик ишканасынын директору, жергиликтүү бийликтин өкүлдөрү жана башка коноктор келишти. Мында бир эле китеп көргөзмөсү эмес, ар тараптан даярдыктар көрүлдү. Мисалы, “Англис тилинде сүйлөйбүз”, “Баракелде” мүмкүнчүлүгү чектелген жарандар арасындагы конкурс, “Менин келечегим” жаш сүрөтчүлөр арасында, “Мыкты акын”, “Мыкты жазуучу” жана башка конкурстар өткөрүлөт. “Китеп кербени” бүгүн түнкү саат он бир жарымда жыйынтыкталат,- дейт С. Аталиева.