2014-жылдан бери Сирия жана Иракта “Ислам мамлекети” тобуна каршы күрөшкөн эл аралык коалициянын соккусунан 352ден кем эмес жай тургун мерт кетти. Бул маалыматтарды 3-апрелде АКШнын аскер мекемеси жарыялады.

Бирок батыш агенттиктери бул көз карандысыз топтор чогулткан статистикадан алда канча аз экенин белгилешүүдө. Маселен, Airwars байкоочу тобу 3 миңден ашуун жай тургун коалициянын авиасоккуларынан көз жумганын кабарлоодо.

Пентагон бул атайын жасалбаганын билдирип, жакындарын жоготкондордун үй-бүлөлөрүнө көңүл айтты. АКШнын аскер мекемесинин билдирүүсүндө авиарейддер алдында алдын ала сактык чаралары көрүлгөнү, ага карабай соккулар курмандыктарга алып келгени айтылат.

АКШ жихадчыларга карата аскердик операциясын 2014-жылы августта баштаган. Бул учурда куралдуу экстремисттер Ирактагы кеңири аймактарды, анын ичинде чоңдугу боюнча экинчи орунда турган Мосул шаарын басып алышкан болчу.