Өзгөндүн Аюу айылындагы жер көчкү басып калган эки кыздын сөөгү табылды. Бул тууралуу КР ӨКМнин басма сөз кызматы билдирди. Маалыматка ылайык, алар айыл тургуну Абдисалам Ризабаевдин он эки жана эки жаштагы кыздарынын сөөктөрү экени аныкталды.

Буга улай үчүнчү адам - 20 жаштагы Гүлайым Назирбаеванын сөөгү табылганы дагы кабарланды. Өзгөчө кырдаалдар министрлигинин басма сөз кызматы кабарлагандай, анын денеси 30-март күнү саат 17:40та топурак астынан чыгарылды

29-апрелде эртең менен Оштун Өзгөн районундагы Аюу айылында жер көчкү жүрүп, жети үйдү басып калган. Жер көчкү алдында калган алты үйдө 24 адам болгон.

Кечээ эртең менен кыламык кар жаап, жер баткак жана суу болгонуна байланыштуу издөө иштери убактылуу токтотулган. Бирок көчкү түшкөн жердин жогору жагына суу топтолуп калып, айылды каптоо коркунучу жаралгандыктан, куткаруучулар суунун нугун буруу үчүн көчкү жүргөн жерден арык кылып казуу иштерин жүргүзүп жаткан. Сөөктөр ошол учурда табылган. Учурда издөө иштери толук жанданып, ага 275 адам катышууда.