Казакстандын Актөбө облусунун имамдары аш берүүдөгү ысырапкорчулукка каршы «жөнөкөйлөтүлгөн меню» иштеп чыгышты. Көбүнчө казак улуттук тамактарынан турган ал меню 13-апрелден тарта шаардагы борбордук мечиттин жанындагы ашканада колдонулат.

«Бул менюну бекитээрден мурун облустагы райондордун бардыгын кыдырып чыктык. Жергиликтүү тургундардын арасында сурамжылоо жүргүздүк, ага жалпысынан 1 230 киши катышты. Алардын 85 пайызы аш берүүдөгү ысырапкорчулукка каршы экендиктерин билдиришти», — деди Казакстан Мусулмандар дин башкармалыгынын Актөбө облусу боюнча өкүлү Толеби Оспанов.

Анын айтымында, эми бул менюну жергиликтүү ресторандар менен кафелерге таркатуу мерчемделүүдө. Андан сырткары облустагы имамдарга ысырапкорчулуктун зыян экендиги тууралуу калк арасында диний үгүттөрдү күчөтүү тапшырылды.

Жаңы менюга ылайык, облустук мечиттин алдындагы ашканада 100 кишинин чыгымы 170 миң теңгени (550 доллардын тегереги) түзөт. Анын 105 миңи азык-түлүк сатып алууга жумшалса, калганы ашкана кызматкерлерине берилет. Ошол эле маалда жергиликтүү ресторандарда 100 кишиге аш берүүдө кеминде 300-400 миң теңге чыгымдалып келет.