Түркмөнстандын Балкан облусунда борпоң кумдардын көчүүсү күчөдү. Кум жолдорду, эл жашаган конуштарды жана социалдык объектилерди, анын ичинде мектептерди каптоодо.

“Азаттыктын” түркмөн кызматынын кабарлашынча, көчкөн кумдун кесепетинен облустагы үч мектепке бара турган жол жабылды.

Желаргы болгон сайын Йылгынлы айылынын четиндеги кум дөбөлөр жылып, мектепти каптап калууда. Айыл тургундарынын бири маалымдагандай, учурда мектепке бара турган жол дагы жабык.

15 жыл мурун бул айылдын жашоочулары жылып жүрчү кумдун айынан түндүктү көздөй үч чакырым аралыкка жер которушкан. Мектеп болсо ордунда калган.

Учурда айылдын айрым үйлөрүнүн чатырына чейин кум каптап калды. Жергиликтүү тургундар облустук бийликтен жардам сурап кайрылышкан, бирок жооп алыша элек.