Жогорку Кеңеш бүгүн жалпы жыйында террорчулук менен экстремизмдин идеяларын тараткан сайттарды жабуу тууралуу мыйзам долбоорун үчүнчү окууда жактырды.

Жарандык-процессуалдык кодекске жана “Экстремисттик ишмердүүлүккө каршы күрөшүү жөнүндөгү” мыйзамга киргизилген өзгөртүүлөр экстремисттик маалымат таратты деп айыпталган сайттарды сот өкүмү чыкканга чейин эле жабууга мүмкүнчүлүк берет. Кыргыз өкмөтү сунуштаган документке ылайык, экстремисттик материалды камтыган сайттарга сотко чейин эле прокуратуранын көрсөтмөсү менен үч-беш күн ичинде чектөө киргизилип, Транспорт жана байланыш министрлиги өчүрүп салат. Эгерде сот экспертиза туура эмес чыкканын аныктаса, сайт кайра иштесе болот.

ИИМдин Кибер коркунучтарга каршы бөлүмүнүн башчысы Улан Бердибаев билдиргендей, өлкөдө жыл сайын радикалдык, экстремисттик үгүт иштерин жүргүзгөн 20га жакын сайт жабылат. Бирок алар атын жана IP дарегин өзгөртүп, ишмердигин улантып жаткан учурлар да бар.