Жалал-Абад шаарында эл арасындагы бейпил жашоонун, улуттар аралык ынтымактыктын, достуктун, күн менен түн теңелгендеги жаңырган жаздын салтанаты курду.

Жыл сайын белгиленүүчү “Нооруз” майрамы шаардын борбордук Эркиндик аянтында уюштурулуп, ал жерге шаар тургундары, шаарга келген коноктор келишти. КР өкмөтүнүн облустагы ыйгарым уктуктуу өкүлү Кыянбек Сатыбалдиев, Жалал-Абад шаарынын мэри Салайдин Авазов, КР Транспорт жана жол министри Жамшитбек Калилов майрамга келген элди жаз майрамы менен куттукташып, аларга жакшылыктарды каалашты.

Атайын жасалгаланган Эркиндик аянтында шаардык маданият сарайынын, маданият бөлүмүнүн жана Т.Тыныбеков атындагы облустук филармониянын, шаардык балдардын музыкалык мектеби менен “Ариет” балдар чыгармачылык үйүнүн күчү менен даярдалган чоң программадагы концерт тартууланды. 

Эркиндик аянтында балдардын комузчулар ансамбли “Маш ботой" күүсүн чертишип, шаардыктардын жарпын жазса, КР эл артисттери Шахра Талипова, Арзыбек Бедияров, маданият тармагынын мыктысы

Базарбай Мадоморов, Кымбат Бердалиева, эстрадалык аткаруучу Эмил Балтагулов, облустук филармониянын “Мөлмөл” тобу, белгилүү төкмө акын Рахматулла Козукеев жана башкалар тамшандырган ыр-күүлөрү менен майрамды көркүнө чыгарышты. Бийчилер топторунун не бир көркөм бийлери жаз майрамын шаңга бөлөштү.

Улуттук кийимдерди кийишкен кымча бел кыздар майрамдап келген элге боорсок менен сүмөлөктөн ооз тийгизишти.