Кургак учук менен ооруп калып, бирок дарылануудан баш тарткандарды мажбурлап дарылоого кириптер кылынышы керек. Бул тууалуу Жалал-Абад шаарынын аймактарындагы саламаттыкты сактоо системасын башкаруу боюнча координациялык комиссиясынын жыйынында айтылды.

Жалал-Абад шаарынын вице-мэри Айзат Раматиллаева төрагалык кылган бул комиссиянын жыйынына медицина мекемелеринин жетекчилери, тийиштүү муниципалдык кызматтардын башчылары, коомчулуктун өкүлдөрү келишип, шаардагы кургак учук менен ооруп калуулардын абалы талкууга алынды.

Тийиштүү адистерди айтымында, бул биосоциалдык ооруга чалдыгып калуулардын шаардагы абалы жалпы өлкөдөгү абалга салыштырмалуу кыйла дурус, анткени ооруга жаңы чылдыккандар саны мурдагы жылга салыштырмалуу өткөн жылы 6,8 пайызга өскөн.

Ошол эле мезгилде, башка аймактарда өсүү 15тен 114 пайызга чейин жеткен. Азыркы кезде 52 киши дарыланып жатса, алардын экөөсү балдар. Шаар боюнча жалпы ушундай 248 оорулуу бар болсо, алар ДОТС программасы менен дарыланып жатышат. 2015-жылы жылы алгачкы эки айда флюрографиядан өткөрүү планы 87 пайыз аткарылса, 2016-жылы ал 94 пайызга жогорулаган. Алдын алуу, түшүндүрүү иштери жүргүзүлгөн.

Жыйында кургак учук оорусу боюнча алганда башкы көйгөйдү тышкы мигранттар жаратып жатканы айтылды. Алардын арасынан ооруга чалдыкканы аныкталган соң, дарылануудан баш тартып, кайра эле чет жактарга кетип калышкан фактылар көбөйүп жатканы белгиленди. Кептин баары, алардын арасында кургак учукка туруктуу формасы менен ооруп, коомчулукка коркунуч келтиргендер аз эмес. Ошондуктан, медицина кызматкерлери мындай оорулууларды мажбурлап дарылоо  механизми атайын мыйзам актылары аркылуу каралышы зарылдыгын тастыкташты. Андан тышкары, балдар арасында бул ооруга чалдыгуу аз болгону менен алардын арасында оорунун туруктуу формасы менен ооругандары бардыгы жыйындын катышуучуларын ойго салды.

Жыйында кургак учуктун алдын алуу, дарылонун натыйжалуулугун күчөтүү, ооруканаларды материалдык-техникалык жактан жакшыртуу, медицина кызматкерлерине жакшы шарттарды жаратуу боюнча чечимдер кабыл алынды.