Боспиек айылындагы Аксы окуясынын курмандыктарын эскерүү иш-чарасында оппозиция өкүлдөрүнүн чыгып сүйлөшүнө уруксат берилген жок.

"Азаттык" радиосунун кабарчысы билдиргендей, укук коргоочу Турсунбек Акун президенттик аппараттын жетекчиси Сапар Исаков, премьер-министр Сооронбай Жээнбековдон кийин сүйлөөгө аракеттенип, бирок күч кызматкерлери аны микрофонго жолотподу. Турсунбек Акун буга нааразылык билдирди.

Аксы окуясын эскерүү үчүн Боспекке Бишкектен "Сөз эркиндигин коргоо комитетинен" өкүлү Равшан Жээнбеков, мурдагы акыйкатчы Турсунбек Акун, парламент депутаты Каныбек Иманалиев, Убактылуу өкмөттүн мүчөлөрү Азимбек Бекназаров, Эмилбек Каптагаев барган.

- Эскерүү иш-чарасына мамлекет башчыдан тартып, бардык бийлик өкүлдөрү, Убактылуу өкмөттүн мүчөлөрү, коомдук-саясий ишмерлер жана жаш саясатчылар чакырылган. Анткени, Аксы окуясы Кыргызстан эгемендик алгандан берки убактагы алгачкы саясий маанилүү окуя,- деди БЭК партиясынын төрагасы Руслан Бекназаров.

Эскерүүдө президенттик аппараттын башчысы Сапар Исаков президент Алмазбек Атамбаевдин кайрылуусун чогулган элге окуп берди:

- Мындан 15 жыл мурда “Аксы” деген ат Кыргызстанды бүт дүйнөгө дүӊгүрөткөн. Эркиндик, адилеттик үчүн керек болсо жан аябай күрөшүү керек экенин аксылык баатырлар өз өмүрүн берип көрсөтүшкөн. Аксылыктар кыргыздардын байыркы замандан берки “түгөнгөн сайын түтөп, кырылган сайын күчөгөн” эр көкүрөк эл экенин эске салган! Эркиндик, адилеттик, намыс деген дөөлөттөр каныбыздан эч качан кетпей турганын эске салган!

Аксы окуясы болбосо Март-2005 жана Апрель-2010 революциялары болмок эмес. Бул үч окуя эгемен Кыргызстандын демократия жолундагы, жаңы коом, жаңы мамлекет куруу жолундагы эң оор, бирок эң маанилүү үч ашуусу болгон, - деп айтылат кайрылууда.

Жээнбеков жана жабырлануучулардан Максат Момункулов сүйлөгөндөн кийин өкмөттүн Жалал-Абад облусундагы өкүлү Кыянбек Сатыбалдиев келгендерге, бийликке ыраазылык билдирүү менен иш-чараны жабык деп жарыялады.

Бишкектеги эскерүү иш-чарасына барган президент Алмазбек Атамбаев эстеликке гүлчамбар койду. Бул тууралуу президенттик аппараттын маалыматтык-саясат бөлүмү билдирди.

2002-жылы 17-мартта Аксыда кыргыз жеринин бүтүндүгү, акыйкаттык үчүн, үй-бүлөлүк, тоталитардык башкарууга каршы жөө жүрүшкө чыгышкан элге бийлик ок атып, алты киши курман болгон.

"Азаттык" үналгысы.