Жалал-Абад облустук кан борборунда Улуттук Кызыл Ай коомунун Жалал-Абад облусундагы өкүлчүлүгүнүн кызматкерлери менен ыктыярчылар кан тапшырышты. Бул тууралуу “Кыргыз Республикасында өз ыктыяры менен кайтарымсыз кан тапшырууну өнүктүрүү” долбоорунун аймактык кызматкери Назгүл Назарова билдирди.

Анын айтымында, башка мекеме-ишканаларга үлгү көрсөтүү, донорлук кылуу боюнча коомдук активдүүлүктү арттыруу максатында Улуттук Кызыл Ай коомунун кызматкерлери менен ыктыярчылары биригип, жалпы 30га жакын киши өз ыктыяры менен кан тапшырышты.

 - Бизден кийин дагы башка мекеме-ишканалардын, жогорку окуу жайлардын кызматкерлери, студенттери өз каалоолору менен келип кан тапшырышат деп ойлойбуз. Анткени, биз тапшырган кан кайсыл бир канга муктаж болуп жаткан жарандардын өмүрүн сактоого, жашап кетишине өбөлгө түзөт. Биз мындай иш-чараларды тынымсыз жүргүзүп турабыз. Буюрса, Жалал-Абад облустук кан борборунун донордук кандын көлөмүн камсыз кылуу боюнча быйылкы жылы да алдыңкы орунга чыгарууга аракет жасайбыз, - дейт ал.

Эскерте кетсек, “Кыргыз Республикасында өз ыктыяры менен кайтарымсыз кан тапшырууну өнүктүрүү” долбоору быйылкы жылы өлкөнүн жети аймагында өз ишин баштап, аны Швейцариянын Кызыл чырым коому каржылап жатат.