Кечээ, 6-март күнү Жалал-Абад шаарындагы “Багери” ресторанында КР өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев 8-Март-Аялдардын Эл аралык майрамына карата район-шаарлардан келген 150гө жакын аялдарга сый-тамак берип, белектерди тапшырды.

Өкүл өзүнүн куттуктоо сөзүн сүйлөп, аялзаты куттуу үйдүн коломтосунун очогун өчүрбөй, балдарыбызга бешик ырын ырдап, мээримин төгүп келе жаткандыгына токтолуп өттү.

- Энелерибиздин мамлекет жана коом алдындагы ак эмгектери тоо көтөргүс оор жүк десек жаңылбайбыз. Асылзат аялдар коомдук турмуштун активдүү катышуучулары жана жаратмандары десем дагы аша чапкандыкка жатпайт. Ар дайым аман жана бар болуңуздар кадырлуу энелер жана асылзаада айымдар. Келе жаткан 8-март – Аялдардын Эл аралык майрамы баарыңыздарга куттуу болсун. Нур тамган жүзүңөрдөн эч качан жылмаюу менен күлкү кетпесин. Бактылуу балдарыбыздын шаңдуу күлкүсү ар бир үйдө жаңырсын. Дагы бир жолу майрамыңыздар менен!, - деди өкүл К.Сатыбалдиев.

Куттуктоо сөзүнөн кийин өкүл К.Сатыбалдиев ар бир асылзат айымдарга белектерди тапшырып, жакшы-каалоо тилектерин билдирди.