Быйылкы жаздын биринчи күнүн Жалал-Абад шаарынын жетекчилери коомдук жайларга бак көчөттөрүн отургузуу менен башташты. Бул тууралуу шаар мэриясынан билдиришти.

Жалал-Абад шаарынын мэри Салайдин Авазов өз орун басарлары, муниципалдык айрым кызматтардын жетекчилери менен биргеликте коомдук жайларга арчанын көчөттөрүн отургузуу менен башташып, быйылкы жылда шаарда жакшы ийгиликтердин болушун каалашты.

- Албетте, жашылдандыруу, көрктөндүрүү иштери шаарда буга чейин эле башталып, жүргүзүлүп келет. Бирок, быйылкы жаздын алгачкы күнүн биз шаар жетекчиси С.Авазов башында турган жетекчилер менен символикалуу түрдө көчөт отургузууга арнадык. Муну менен биз шаарыбызда жана бүт өлкөбүздө быйылкы жылы түзүүчүлүк иштердин көп болушуна, ар кайсы тармактарда жүрүп жаткан иштер ийгиликтүү аякташына, коомубузда тынчтыктын болушуна тилек кылдык, - дейт шаардын биринчи вице-мэри Турдалы Темирбаев.

Эскерте кетсек, шаардагы бир канча борбордук көчөлөрдүн боюна 400 түп арчалар отургузулду, көчө бойлоруна эми 1 миллионго жакын гүлдөр эгиле турган болду.