2016- жылдын жыйынтыгы менен 24- февралда Бишкектеги “Хаят” ресторанында КР Өкмөтү жана КР экономика министрлиги тарабынан уюштурулуп өткөрүлгөн “Кыргыз Республикасынын мыкты экспортеру - 2016”  кароо-сынагына Жалал-Абад облусунан 6 ишкана катышып, алардын ичинен 4 ишкана республикалык кароо-сынактын жеңүүчүлөрү болуп табылышты.

Атап айтсак, Таш-Көмүр шаарындагы көмүр өндүрүүчү “Тегене” ЖЧКсы “Жалал-Абад облусунун мыкты экспортеру” наамына, Базар-Коргон районундагы пахта буласын иштеп чыгаруучу “Коттон Текстиль Фактори” ААКсы “Жеңил өнөр жайынын мыкты экспортеру” наамына, Сузак районундагы айнек жана таш буюмдарын жасоочу “Эко Стоун” ЖЧКсы  “Айнек жана таш буюмдарынын мыкты экспортеру” наамына жана Сузак районундагы органикалык таза пахта өндүрүүчү СТСК “Био Фермер” “Мыкты экспортер бирикмеси” наамынын жеңүүчүлөрү болуп калышты.

2016-жылдын мыкты экспортеру республикалык кароо-сынагынын жеңүүчүлөрү болушкан ишканалардын жетекчилери КР Премьер-министри Сооронбай Жээнбеков тарабынан Диплом жана атайын статуэтка менен сыйланышты. Жеңүүчү катары аныкталган ишканалар өздөрү иштеп чыгарган продукцияларына “Кыргыз Республикасынын мыкты экспортеру” логотивин колдонуу укугуна ээ болушту.

Өткөн жылдын жыйынтыгы менен Жалал-Абад облусунун 123,2 млн. АКШ долларында  айыл чарба азык түлүктөрү, сырьелор жана товарлар чет өлкөлөргө жөнөтүлүп, экспорттун өсүү темпи 151,2 пайызды түздү.

Азыркы күндө Жалал-Абад облусу боюнча 70тен ашуун ишканалар, кооперативдер жана жеке ишкерлер экспорттоо менен тыгыз иш алып барышып, облустун жана республиканын экономикасынын өсүүсүнө өздөрүнүн чоң салымдарын кошуп келе жатышат.

 Жолдошбай Осмонов, журналист