Өмүрбек Текебаевдин аэропорттон кармалып УКМКга алынып кеткени ырасталды. Мындан сырткары азыркы сааттарда депутат Каныбек Иманалиев менен "Манастан" түз эфир уюштуруп жаткан "Азаттыктын" журналисти Уланбек Эгизбаевди милициялар кармап кетишкени маалым болду.

Учурда чогулган эл УКМК тарапты көздөй кетишүүдө.

Эскерте кетсек, кечээ, 25-февралда Башкы прокуратура “Ата Мекен” фракциясынын лидери Өмүрбек Текебаевге Кылмыш-жаза кодексинин 303 (коррупция) жана 166 (алдамчылык) беренелери боюнча кылмыш иши козгогону тууралуу маалымат тараткан.

Башкы прокуратура депутат Текебаевге карата "коррупция жана "алдамчылык" беренелери боюнча кылмыш иши козголгонун ырастады

Башкы прокуратура “Ата Мекен” фракциясынын лидери Өмүрбек Текебаевге буга чейин айрым маалымат каражаттары жазгандай кечээ эмес, бүгүн 25-февралда кылмыш иши козголгону тууралуу расмий маалымат таратты. Андагы маалыматка ылайык, Ө.Текебаевге иш Кылмыш-жаза кодексинин 303 (коррупция) жана 166 (алдамчылык) беренелери боюнча кылмыш иши козголду.

Буга УКМКдан келген материалдар негиз болгон, ал эми УКМКга Россиядагы бир катар телекоммуникация компаниясын жетектеген Леонид Маевский кайрылган.

Л.Маевский арызында 2010-жылы Текебаев Убактылуу Өкмөттүн төрайымынын орун басары болуп турганда Л.Маевскийди “Альфателекомдун” башкармалыгына киргизүү милдеттенмеси менен андан 1 млн доллар алгандыгы, ал акчага ылайык, алгач Л.Маевский  «Альфа Телеком» ЖАКтын башкармалыгына кирээри, "Мегаком" сатылгандан кийин 10-15% кирешеге ээ болмоктугун көрсөткөн. Бирок,Өмүрбек Текебаев айткан убадасына турбагандыгы жана "Мегаком" сатылбай калгандан кийин да Маевскийдин 1 млн долларын кайтарып бербегендигин, аны менен катар бул тууралуу маалыматты коомчулукка жарыяласа, күч менен жок кылаарын көрсөткөн.

"Мына ушул арыздын негизинде Л.Маевский бул тууралуу буга чейин бир нече ирет ачык айтып келген ЖКнын экс-депутаты, «Ата-Мекен» партиясынын мурунку мүчөсү Өмүрбек Абдрахмановдын жана «Пенвел» компаниясынын өкүлү Раушан Рыкунованын сөзүн дээрлик толугу менен далилдеди" деп жазылат Башкы прокуратура тараткан маалыматта.

Тергөө иштери башталган бул кылмыш иши УКМКга жүктөлгөнү кошумчаланат.

“INTER.KG”