Түркмөнстанда түрк оппозициячысы Фетуллах Гүлен менен байланышы бар деген айып менен өткөн жылы октябрда кармалган 30дан ашык адам узак мөөнөттөргө соттолду. Арасында 25 жылдан эрктеринен ажыратылган белгилүү ишкерлер Ресул Атагелдыев менен Довлет Атаев да бар.

«Азаттыктын» түркмөн кызматынын булактары билдиришкендей, Ахал облустук соту тарабынан соттолгондор негизинен түркмөн-түрк лицейлеринин мурдагы мугалимдери жана жумушчулары. Басылма буга чейин «Хизмет» уюмуна байланышы бар деген айып менен ишкерлер менен мурдагы педагогдордун жапырт кармалып жаткандыгын билдирген болчу.

Ахал облустук соту 8-9-февралда жалпысынан 30 кишиге карата өкүм чыгарган. "Алардын арасында сурак маалында жабыр тарткандар өтө көп. Ошондуктан соттолгон мугалимдерди Байрамали колониясына жөнөтүштү», - деп билдирди «Азаттыктын» маектеши.

Буга чейин борбордогу «Мердем» жана «АлпЭт» ресторандарынын ээси Ресул Атагелдыев менен «А-Маркет» дүкөндөр түйүнүнүн ээси Довлет Атаевдин түрмөгө камалганы кабарланган.