Түркмөнстан президенти Гурбангулы Бердымухамедов өлкөнүн кеңешчи органы эсептелген Ак сакалдар кеңешинин ролун бекемдеп, анын ыйгарым укуктарын кеңейтүү ниетин билдирди. Мамлекет башчынын айтымында, мындай иштер өлкөнүн саясий системасынын ишин жакшыртуунун алкагында жүзөгө ашырылат.

"Бул максатта биз Ак сакалдар кеңешинин быйыл өтө турган жыйынында Кеңештин ролун жогоруулатуу тууралуу жобого киргизилчү мыйзамдык өзгөртүүлөрдү талкуулап, аны Межилистин кароосуна жөнөтөбүз",- деп билдирди Бердымухамедов.

Президент коом үчүн маанилүү болгон маселелерди ак сакалдар менен талкуулоо «байыркы демократиялык салт» экенин жана ага ылайык, мындан ары Межилис жана министрлер кабинети тарабынан кабыл алынган кандай гана маанилүү чечим болбосун Ак сакалдар кеңеши жактыргандан кийин гана күчүнө кириши керектигин белгиледи.

Гурбангулы Бердымухамедовдун бийликке келиши менен 2006-жылы өлкөнүн жогорку өкүлчүлүктүү органы болгон Элдик кеңеш (Халк маслахаты) жоюлуп, анын ыйгарым укуктары жарым-жартылай Ак сакалдар кеңешине өткөрүлүп берилген.

Салттуу түрдө Ак сакалдар кеңешинин жыйыны жылына бир жолу өтүп, катышуучулар жергиликтүү бийлик органдары тарабынан тандалат. Расмий тизмеге ылайык, кеңештин жыйынына 600 ак сакал катышат.