Жалал-Абад облусунун Базар-Коргон, Аксы райондоруна ушул аптада жаны акимдер дайындалат. Бул тууралуу өкмөттүн Жалал-Абад облусундагы өкүлү Кыянбек Сатыбалдиев маалымат жыйында билдирди.

Анын айтымында, Базар-Коргондун акими Таалайбек Долдоев кызматтан кетүү үчүн арызын жазып, эмгек эргүүсүнө чыккан. Ал эми Аксынын мурдагы акими Медетбек Айдаралиев өткөн жылы Миграция комитетинин жетекчиси болуп дайындалган.

“Сузак жана Тогуз-Торо райондорунун акимдеринин үстүнөн кылмыш иши козголуп, иштери сотто каралып жатат. Анын жыйынтыгы менен чечим кабыл алынат. Өткөн аптада өкмөт башчынын жарлыгына ылайык, Ноокен районунун  жаңы акими дайындалган”, - деди К.Сатыбалдиев.