Кыргыз Республикасынын Президенти Алмазбек Атамбаевдин 16-февралда Бельгия Королдугуна жумушчу сапарынын жүрүшүндө Евро комиссия тарабынан Жалал-Абад облусунун айыл жерин таза суу менен камсыз кылуу үчүн 10 млн. евро бөлүнүп берилди. Бул тууралуу Өкмөттүн Жалал-Абад облусундагы ыйгарым укуктуу өкүлү Кыянбек Сатыбалдиев бүгүн, 20-февралда журналисттерге берген маалымат жыйынында билдирди.

Анын берген маалыматына караганда, Президенттин иш сапарындагы делегациянын курамында болуп, бир топ келишимдерге кол коюлуп, сапар жемиштүү болгон. Ал жерде Европа комиссиясынын Төрагасы Жан-Клод Юнкер менен жолугушту. Жолугушууда финансалык келишимдерге  кол коюлуп, тараптар маселелердин кеңири спектрин, эки тараптуу мамилелерди өнүктүрүү боюнча маселелерди талкуулашты.

“Жалал-Абад облусунун айылдарында жашаган калкын таза суу менен камсыз кылуу үчүн 10 млн. евро бөлүнүп, бүгүнкү күндө каралууда. Бул да мамлекеттин жетишкендиги, Европа биримдиги менен эки тараптуу мамилени жакшыртууга көмөк болот. Акыркы 5 жылда Кыргызстанда демократиялык өнүгүүлөр болуп жаткандыгын эске алуу менен ирригация тарамгын, региондорду өнүктүрүү боюнча 72 млн. еврону бөлүп жатат. Негизинен башка банктардан жардам иретинде  да кредиттер, гранттар келип жатат. Таза суу менен иштеп жатышат. Облуста 68 айыл өкмөт болсо, 420дан ашыык айылдар бар. Жакында Европа комиссиясынан эксперттер келишип, биздин адистер менен биргеликте таза суу жетпеген айылдарга мониторинг жүргүзүшөт. Тактап туруп, анан өтө муктаж болгон айылдарга каражатты сарптайбыз. Бул бөлүнгөн каражат аябай көзөмөлдө болот. Каражатты 5 жылдын ичинде 100гө жакын айылга жеткирип, калкты таза суу менен камсыз кылуубуз керек. Европа биримдиги биринчи траншты Жалал-Абад облусуна бөлдү.Калган обулустарга да ушундай эле каражаттар берилет”, - дейт К.Сатыбалдиев.