Өзбекстан президенти Шавкат Мирзиёев кылмыш иликтөө жана тергөө менен алектенген бөлүктөрдүн ишин материалдык жактан сыйлоо системасын киргизүү керек деп эсептейт. Мындай пикирин ал ички иштер органдарынын ишмердүүлүгүнө арналган жыйында билдирди.

Мирзиеёв Башкы прокуратура, ИИМ башчыларына бир ай ичинде кылмыш иликтөө жана тергөө менен алектегенген бөлүктөрдүн ишмердүүлүгүн жакшыртуу жана кызматкерлердин жоопкерчилигин көтөрүү үчүн аларды материалдык жактан сыйлоо боюнча долбоор иштеп чыгууну тапшырды.

– Алар прокуратурада, коопсуздук кеңешинде, ички иштер органдардында эмгектенишет, баары бир эле иш менен алектенет, бирок жыйынтык жок. Келгиле, кылмыштын бетин ачкан кызматкерлерге материалдык жактан дем берели. Алардын ишине жараша айлыктарын эки, үч жана төрт эсеге көбөйтөлү. Себеби азыр кылмыштын бетин ачканы да, ача албаганы да бирдей маяна алып жатат, – деди Шавкат Мирзиёев.

Селектордук жыйын учурунда Шавкат Мирзиёев ички иштер органдарынын ишин катуу сынга алып, эл милицияга нааразы экенин билдирди. Президенттин айтымында, былтыр 4518 тартип сакчысы иштен кеткен. Алардын көпчүлүгү пара талап кылуу, кызматынан кыянат пайдаланууга айыпталышкан.