Мындан ары Тажикстан менен Ооганстан абактарда кармалып турган жарандарды бири-бирине өткөрүп берип турат. Эки өлкө ортосундагы тиешелүү макулдашуу 16-февралда Тажикстан парламенти тарабынан ратификацияланды.

Тажикстандын Ички иштер министрлигинин маалыматына ылайык, келишим күчүнө киргенден кийин өлкөдө кылмыш жасап, коңшу мамлекеттин аймагына өтүп кеткен тажик жарандарын өткөрүп алуу мүмкүндүгү да түзүлөт.

ИИМ өкүлү Тажикстан менен Ооганстандын абактарында кармалып турган эки өлкөнүн жарандарынын так санын айткан жок. Бирок тажик түрмөлөрүндөгү ооган жарандарынын көбү маңзат сатуу жана чек арадан мыйзамсыз өткөндүгү үчүн соттолгондор экенин, ал эми Ооганстанда кармалып турган тажик жарандарынын көбүн террордук мүнөздөгү кылмыштар менен камалгандар түзөрүн белгиледи.