Евробиримдиктин тышкы саясат боюнча жогорку комиссары Федерика Могерини кыргыз президенти Алмазбек Атамбаев менен Брюсселдеги жолугушуусунда Кыргызстанда быйылкы президенттик шайлоонун ачык, акыйкат жана эркин өтүшү маанилүү экенин айтты.

Ал өлкөдөгү шайлоо реформасы жаатында жасалган жылыштарды белгилеп, таза шайлоо Кыргызстандагы демократия үчүн маанилүү деп билдирди

Уюмдун дипломатиялык кызматынын расмий маалыматына ылайык, жолугушууда эки тараптуу “кызматташтыктын чордонунда турган Кыргызстандагы реформа аракеттери” жана адам укуктарынын абалы да талкууланды.

“Эркин Европа/Азаттык" үналгысынын Брюсселдеги кабарчысы Рикард Жозвиакдин билдиришинче, сүйлөшүүлөр маалында 2010-жылы болгон июнь коогасындагы айрым жагдайлар боюнча айыпталган укук коргоочу Азимжан Аскаровдун да маселеси көтөрүлгөн, ошондой эле Европа лидерлери Атамбаевдин болочоктогу мураскерине да кызыгышкан.

"Могерини да, Туск да Аскаровдун маселесине кайрылышты. Аскаров жөнүндө узак талкуу болду. Алар Атамбаевди бул маселе боюнча бир нерсе кылууга түртүп жатышты. Атамбаев сезимтал болуп турду, маселе чечилгенин, Аскаров бошотулбай турганын айткан экен. Шайлоо маселесинде, алар “мураскериңиз, сиздин ордуңузду басчу адам барбы?” деп сурашты. Атамбаев “менин ордумду ким басарын, кийинки президент ким болорун билбейм, бирок ал президент мендей принципиалдуу жана күчтүү болбой калышы мүмкүн” деп айткан экен",-деди Жозвиак.