Кечээ, 14-февралда Кыргыз Республикасынын Премьер-министри Сооронбай Жээнбековдун буйругу менен Ноокен райондук мамлекеттик администрациясынын башчысы – акими болуп Маматаев Эркинбек Садырбекович дайындалды.Бул тууралуу өкүлдүн басма сөз катчысы билдирди.

Алынган маалыматка караганда, Ноокен районунун активи менен өткөрүлгөн жыйында КР Өкмөт башчысынын тиешелүү буйругун КР Өкмөтүнүн Аппаратынын уюштуруу – инспектордук иштер жана жергиликтүү өз алдынча башкаруу бөлүмүнүн башчысы Эмилбек Бусурманкулов тааныштырды. Буга чейин Ноокен райондук мамлекеттик администрациясынын башчысы – акими болуп иштеп келген Абдырахман Осмонов өз арызына ылайык КР Өкмөт башчысынын буйругу менен кызматынан бошотулган.

Ноокен районуна жаңы акимди дайындоого арналган активдин жыйынында райондук ардагерлер кеңешинин төрагасы Абдыманап Токтогулов Ноокен районунун мурдагы акими Абдырахман Осмоновдун жакшы иш алып баргандыгын белгилеп, жаңыдан дайындалган аким Эркинбек Маматаевге жооптуу ишине активдин катышуучуларынын атынан ийгилик каалады.

Ноокен райондук мамлекеттик администрациясынын башчысы – акими болуп дайындалган Эркинбек Маматаев буга чейин Ноокен районундагы Бүргөндү айыл аймагынын башчысы болуп иштеп келген. Ал жетектеген Бүргөндү айыл аймагы 2015-2016-жылдардын жыйынтыгы менен Кыргыз Республикасынын Жергиликтүү өз алдынча башкаруусунун “Эң мыкты айыл өкмөтү” катары таанылып, 3 млн. сомдук сертификаттын жеңүүчүсү болгон. Эркинбек  Маматаев  1972-жылы январь айында туулган. Ал 1993-жылы К. И. Скрябин атындагы айыл чарба институтунун ветеринария адистигин жана 1997-жылы  Кыргыз мамлекеттик улуттук университетинин кадрларды кайра даярдоо жана квалификациясын жогорулатуу институтунун  “юриспруденция” адистиги боюнча билим алып, юрист адистигине ээ болгон. Үй-бүлөлүү, 4 баланын камкор атасы. “Ноокен районунун Ардактуу атуулу” наамынын ээси.