Орусия президенти Владимир Путин «Түрк агымы» газ куурун куруу боюнча макулдашууну ратификациялады. Бул тууралуу 7-февралда Орусиянын мамлекеттик маалымат каражаттары билдиришти.

Орусия менен Түркия ортосунда кеминде 30 жылга түзүлгөн келишимде 1100 чакырымга созулган газ куурун куруу каралган. Ал аркылуу Орусиядан Түркияга, андан ары Түштүк Европага газ жеткирүү планы бар.

Европа биримдигинин Греция, Венгрия жана Словакия өңдүү айрым мүчөлөрү долбоорго кошулууга кызыктар экенин билдиришкен.

Орусия менен Түркия акыркы айларда ортодогу экономикалык байланыштарды мурдагы калыбына келтире баштады. Эки өлкөнүн алакасы Сириядагы согушка байланыштуу кескин начарлап кеткен. Анда Москва менен Анкара бири-бирине каршы согушуп жаткан эки башка тарапты колдоп келишет. Өлкөлөр экономикалык байланыштарды жолго салуудан тышкары акыркы кездери Сириядагы «Ислам мамлекети» тобуна каршы күрөшүүдө да кызматташып, ок атуу режимин орнотууга багытталган сүйлөшүүлөрдү демилгелешүүдө.