Интернет айдыңындагы айрым терс таасир этүүчү оюндардан балдарды сактоо, аларды оолактатуу иш-чараларына Жалал-Абад шаарындагы ата-энелер активдүү киришишти. Алар мектептерден өткөрүлгөн ата-энелер жана педагогикалык жамааттардын чогулуштарында чогуу аракеттенүү боюнча иш-чараларды түзүшүүдө. Бул тууралуу шаардын вице-мэри Айзат Раматиллаева билдирди.

Анын айтымында, мындай жакшы жөрөлгө шаарда жайгашкан №5 Бекмамат Осмонов атындагы гимназия мектебинде башталды. Интернет айдыңындагы терс көрүнүштөгү оюндар боюнча тынымсыз ата-энелердин чогулушу өткөрүлүп, шаарда балдардын коопсуздугу үчүн ата-энелер менен педагогдор чогуу аракеттенмек болушту.

Мектептин директору Кульнара Мамытованын айтымында, мындай чогуу аракеттер сөзсүз жемишин берет.

- Албетте бул балдардын келечегин ойлоо менен бирге, аларды жакшы жашоого үндөп, андай терс оюндарга эмес, билимге умтулуусун түшүндүрүү жалпыбыздын ишибиз. Ошондой эле шаардык мэрия, шаардык билим берүү бөлүмү, шаардык ички иштер бөлүмүнүн  жаш өспүрүмдөр менен иштөө инспекциясы менен биргеликте тыгыз байланышта иштеп жатабыз. Ата-энелер менен чогуу аракеттенүү боюнча ачык-айкын иш-чараларды түздүк, - дейт ал.

Чогулушка катышкан шаар жетекчилери окуучулардын ата-энелерине балдары үчүн байланыш үчүн интернетсиз жөнөкөй гана уюлдук кол телефон алып берүүсүн, үйдө да көзөмөлгө алуусун сунушташты.

Эскерте кетсек, Жалал-Абад шаарынын бардык мектептеринде, атайын жана жогорку окуу жайларында өспүрүмдөр арасында түшүндүрүү иштери жүрүп жатат.