Жаш өспүрүмдөр арасында интернеттеги кооптуу оюндарга кызыгуу жалпыга маалымдоо каражаттары аркылуу “Көк кит” жана “Бейпил үй” оюндарынын балдарга карата терс таасири тууралуу маалыматтарды дембе-дем жарыялаганынан улам көбөйүп кетти. Бул тууралуу Жалал-Абад шаарынын мэриясында балдардын коопсуздугу тууралуу өткөн тегерек столдо ата-энелер жана мугалимдер айтып чыгышты.

Ата-энелердин жана айрым мектеп мугалимдеринин айтымында, интернеттеги мындай кооптуу оюндар тууралуу көпчүлүк окуучулар мурда билишкен эмес. Качан гана алар тууралуу ЖМКларда кеңири маалыматтар таркаган соң, окуучулар ошол оюндардын даректерин таап, аларга кызыгышкан. Мугалимдер мектепте окуучулар менен бул тууралуу баарлашкан учурда окуучулар бул оюндарга качан жана кантип кызыгып калышканын ачык айтып беришкен. Ушуга байланыштуу тегерек столдун катышуучулары ЖМКлардын өкүлдөрүнө ар кайсы маалыматтарды таркатууда этияттанууга чакырышты.

Эскерте кетсек, Жалал-Абад шаарынын мэриясы интернеттеги айрым кооптуу оюндарга байланыштуу балдардын коопсуздугун камсыз кылуу боюнча тегерек стол өткөрүп, ага бийлик органдарынын, билим берүү тармагынын, коомчулуктун, ЖМКлардын өкүлдөрү катышышты. Буга чейин шаар мэриясы балдардын коопсуздугун камсыз кылуу боюнча бир айлык жарыялаган.