Астанада Сириядагы согушту жөнгө салуу боюнча сүйлөшүүлөрдүн экинчи айлампасы өтүүдө. Казакстандын Тышкы иштер министрлиги билдиргендей, Орусия, Түркия жана Иран Сириядагы ок атышууну токтотуу режимин камсыздоо боюнча кабыл алынган механизмди талкуулоого чогулушту. Астанадагы жыйын БУУнун жана Иордания өкүлдөрүнүн катышуусу менен өтүүдө.

23-24-январдагы сүйлөшүүлөр алты жылга созулган жарандык согушту жөнгө салуу боюнча алгылыктуу натыйжа берген эмес. Бирок тараптар урушка байкоо жүргүзүү боюнча бирдиктүү ыкчам топ түзүүгө макулдашкан. Бул топко Орусия, Иран жана Түркиянын эксперттери кирген.

Москва менен Тегеран жарандык согушта Сирия президенти Башар Асаддын күчтөрүн жактаса, Анкара оппозициялык күчтөрдүн бир бөлүгүн колдойт.

2011-жылы башталган согуш 300миңдей кишинин өмүрүн алды, миллиондогон сириялыктар үйлөрүн таштап кетүүгө аргасыз болушту.