Ушул жылдын 25-январында жыл жыйынтыгы чыгарылган Жалал-Абад облустук коллегиясында уктап калган жана уюлдук телефондорун чукулап ойноп олтурган бир катар жетекчилерге облустук өкүлчүлүктүн жетекчилиги тарабынан акыркы эсертүү берилди деп маалымдады өкүлдүн басма сөз катчысы.

Алынган маалыматка караганда, жыл жыйынтыгы чыгарылган облустук коллегиянын жыйынында Аксы районунун Кербен шаарынын вице-мэри Капар Мырзамамытов, КР Өкмөтүнүн алдындагы Мамлекеттик өнүктүрүү фондунун облустагы өкүлү Миразиз Аширов жана республикалык Мамлекеттик байланыш комитетинин РПО РМТРдин жетекчисинин орун басары Казыбек Тоголоковго акыркы эскертүү берилди. Жогоруда ысымдары аталган мамлекеттик кызматкерлер өз кемчилдиктерин толук моюндарына алышып, мындан ары облустук коллегиянын жыйыны мезгилинде этикага жатпаган мындай одоно жагымсыз көрүнүштөрдү кайталабоого өздөрүнүн түшүнүк каттарын да жазып беришти.

Өкүл Кыянбек Сатыбалдиев аппараттын жыйынында мындан кийин облустук коллегияда жана мамлекеттик иш-чаралар өткөрүлгөн маанилүү жыйындарда уктап калышкан жана уюлдук телефондорун чукулап ойноп олтурган мамлекеттик жана муниципалдык кызматкерлерге алар ким экендигине жана ээлеген кызматтарына карабастан андай жетекчилерге кызматтан алуу сунушу берилээрин эскертти.

Эскерте кетсек, үстүбүздөгү жылдын 25-январында жыл жыйынтыгы чыгарылган облустук коллегиянын жыйынына КР Өкмөтүнүн вице-премьер-министри Жеңиш Разаков катышкан. Ал жыйында уктап калган жана уюлдук телефондорун чукулап ойноп олтурушкан бир катар жетекчилер “7 канал D” телеканалынан көрсөтүлгөн.

Жолдошбай Осмонов, журналист