Жалал-Абад шаардык кеңешинде курамына КСДП, "Кыргызстан", "Республика-Ата-Журт" фракциялары кирген жаңы “Ынтымак” коалициясы түзүлдү. Бул тууралуу бүгүн, 6-февралда аталган коалиция мүчөлөрү маалымат жыйында билдиришти.

“Ынтымак” коалициясынын лидери Сайдилла Чымбердиевдин айтымында, коалициянын курамына 18 депутат кирген. 13-февралда биринчи сессия болоору күтүлүүдө. Сессиянын күн тартибинде 3 маселе каралат. Биринчиси,  жаңы түзүлгөн «Ынтымак» коалициясын маалымдоо, экинчиси шаардык кеңештин төрагасын жана үчүнчусү төраганын орун басарын шайлоо маселелери каралаары күтүлүүдө.  

Жыйынга оппозицияда калган «Өнүгүү-Прогресс», «Ата-Журт» фракцияларынын депутаттары да чакырылат. Жаңы түзүлгөн «Ынтымак» коалициясы шаардын мэри кызматына кайрадан Салайдин Авазовдун талапкерлигин көрсөтүшөт.

Үстүбүздөгү жылдын 12-январында “Ата-Журт”, “Өнүгүү-Прогресс”, “Республика-Ата-Журт” партиялары "Биримдик" коалициясын түзгөнүн жарыялап, алгачкы сессиясын чакырышкан. Бирок, 27-январда курамынан “Республика – Ата-Журт” фракциясы чыгып кеткендиктен, “Биримдик” коалициясы бузулган.

Былтыркы жергиликтүү кеңештерге шайлоодо Жалал-Абад шаардык кеңешине КСДП, “Ата-Журт”, “Өнүгүү-Прогресс”, “Республика-Ата-Журт” жана “Кыргызстан” партиялары өткөн.