АКШ президентинин администрациясы Орусияга каршы санкцияларды жеңилдеткендиги тууралуу маалыматтарды четке какты. Акүйдүн өкүлү Шон Спайсер Орусия ФСБсына карата киргизилген чектөөлөрдүн биринин өзгөртүлгөнүн «айрым бир жеңилдиктерди тактоо» деп атады.

Мурдараак АКШнын Каржы министрлиги америкалык жарандар жана компанияларга ФСБ менен кандайдыр бир коммерциялык байланышта болууга тыюу салган чектөөлөр өзгөртүлгөндүгүн билдирген. Мекеме сайтындагы билдирүүдө эми ФСБдан маалыматтык технологияларды ташууга уруксат алуу үчүн жылына 5 миң доллардан акча коротууга мүмкүн болуп калгандыгы айтылган. Бирок анда кеп кандай технологиялар жөнүндө болуп жаткандыгы тууралуу так маалымат берилген эмес.

Өткөн жылы декабрдын соңунда Барак Обаманын администрациясы орусиялык бир канча мекемеге, анын ичинде киберчабуулдардын жардамы менен АКШдагы шайлоого кийлигишкен деген жүйө менен Орусия ФСБсына каршы санкцияларды киргизген.