Былтыр он бир айда Кыргызстан менен ЕАЭБге мүчө өлкөлөр ортосундагы товар жүгүртүү 16,7 % кыскарган. Бул тууралуу  премьер-министр Сооронбай Жээнбеков Жогорку Кеңеште биримдикке мүчө болгондон кийинки жагдайга түшүндүрмө берип жатып айтты.

Маалыматка караганда, Евразия экономикалык биримдигинин жалпы кирешесинен Кыргызстан 2,8 млрд сом албай калды. Өкмөт башчы Кыргызстанда ушул тапта экономикалык кризис бар экенин да билдирди.

Муну убактылуу көрүнүш катары сыпаттаган Жээнбеков абалды Орусияга киргизилген санкцияларга байланыштырды. Ага карабай, бажы планы толгонун белгиледи.

Кыргызстан ЕАЭБге 2015-жылы августта толук кандуу кошулган. Андан тышкары уюмга Казакстан, Орусия, Армения жана Беларус мүчө.

Улуттук статистика комитетинин маалыматы боюнча, өткөн жылы Кыргызстандын ЕАЭБ өлкөлөрү менен соода алакасы 16,7% төмөндөгөн. Биримдик өлкөлөрүнө жасалган экспорт мурунку жылга караганда 8,1% азайган.

Сооронбай Жээнбеков маселени жыл аягына чейин чечүү аракети жүрүп жатканын кошумчалады.