Өзбекстан өкмөтү беш жыл аралыгында экологиялык көйгөйлөргө туш болгон Арал регионуна 2,6 миллиард доллар жумшоого ниеттенүүдө. Шавкат Мирзиёев тишелүү жарлыкка кол коюп, документ 30-январдан тарта күчүнө кирди.

Каражат калктын жашоо деңгээлин жогорулатууга, анын ичинде жумуш орундарын түзүүгө, жаңы үйлөрдү курууга, суу менен камсыз кылууга, медициналык кызмат көрсөтүүнү жакшыртууга, чакан насыяларды берүүгө жана социалдык төлөмдөрү көбөйтүүгө жумшалат.

1960-жылдардан бери табигый көлмөлөрүнүн чоңдугу боюнча дүйнөдө төртүнчү орунда турган Арал деңизинин 90% соолуп кеткен. Бул негизинен деңизди суу менен камсыздаган Амударыя менен Сырдарыянын нугу совет учурундагы ирригациялык долбоорлорго бурулуп кеткендиги менен байланыштуу.

Мындай кырдаал Өзбекстандын Каракалпакстан автономдуу облусу менен Казакстанга оор экологиялык көйгөйлөрдү алып келди.