Украина чыгышындагы абалды жөнгө салуу боюнча түзүлгөн Үч тараптуу байланыш тобунун жыйыны Минискте бүгүн, 1-февралда өтөрү күтүлүүдө. Бул тууралуу топтогу Украинанын өкүлү Дарья Олифер билдирди.

Олифер күн мурун Орусия жана жикчилдердин өкүлдөрү келбегендиктен, топтун видеоконференция форматындагы жыйыны болбой калганын айтты. Орусия башында бул сүйлөшүүгө катышарын айтып, бирок кийин анын максаттуу эместигин билдирип баш тарткан.

Өткөн суткада атышуулар күч алып, бир украин аскер кызматкери мерт кетти. Авдеевка районунда реактивдүү снаряддар жана танктар колдонулду.

31-январда орусиячыл жикчилдер украин армиясы ээлеген айрым позицияларды кайтарып алууга аракет жасады. Эки тараптан тең жоготуулар бар экени, жай тургундар дагы жабыркап жатканы кабарланууда. Авдеевкадагы атышуулардан улам электр менен камсыздоо токтоп, суу жана жылуулук берүү үзгүлтүккө учурады.

Европа Кеңешинин башкы катчысы Турбьерн Ягланд Донбасстагы жаңжалдын бардык катышуучуларын аскердик аракеттерди тезинен токтотууга үндөдү.