Тажикстанда Дүйшөмбү шаарынын мэриясындагы бюджеттик каражаттарды уурдоо схемасы иликтенүүдө. Калаанын жаңы башкы планын иштеп чыгууда ири акча уурдалган деген шек жаралууда.

Коррупция менен күрөшүү жана каржы көзөмөлү агенттиги билдиргендей, шаар тургундарынан арыз түшкөн соң иликтөө башталган. Турак жай долбоорун ишке ашыруудагы жана мэриянын бир катар мекемелериндеги тымызын уурдалган каражаттар иликтенүүдө.

Дүйшөмбүдө "Жеткиликтүү турак жай" долбоору мурдагы мэр Махмадсаид Убайдуллоевдин тушунда, 2013-жылы башталган. Арзан үйлөрдүн алгачкылары эки жылдан кийин эле бүтмөк, бирок курулуш создугуп кеткен. Буга байланыштуу айрым жарандар турак жай курууга салган акчаларын кайра кайтарып алууну талап кылышкан. Курулуштун 70% үй алуучулардын каражаттарына салынмак.

Махмадсаид Убайдуллоев шаар администрациясын 20 жыл жетектеген. Тажикстан президентинин жарлыгы менен 12-январда отставкага кеткен. Ошол эле күнү Дүйшөмбү шаарынын мэри болуп өлкө башчынын уулу Растам Эмомали дайындалган. Ал буга чейин коррупцияга каршы кызматты жетектеген.

Махмадсаид Убайдуллоев Тажикстан парламентинин жогорку палатасынын төрагасы – мамлекеттеги экинчи расмий жетекчи болуп эсептелет.