Калкты маалымат менен тынымсыз камсыздап турган Жалал-Абад облустук мамлекеттик телерадиокомпаниясында (ЖМТРК) “Таамай” студиясы ачылды. Бул тууралуу аталган телевидениенин башкы директору Тургунбай Алдакулов билдирди.

Анын айтымына караганда, ЖМТРКнын материалдык-техникалык базасын чыңдоо аркылуу чыгармачылык алдыңкы чектерди багындыруу аракеттери жүрүп жатат. Ачылуу аземине шаардын мэри Салайдин Авазов да катышып, куттуктоо сөзүн сүйлөп, жаңы студиянын ишине ийгиликтерди каалады.

- Өзүңүздөргө маалым болгондой, мамлекеттик телеканалдарды санариптик телеберүүгө өткөрүү үчүн мамлекет тарабынан атайын жүз миллион сом акча каражаты бөлүнгөн. Ошол долбоордун негизинде каналга техникалык жабдуулар белекке келип олтурат. Андан тышкары, жергиликтүү бийликтер да бизге көптөгөн колдоолорун көрсөтүшүүдө. Учурдан пайдаланып жергиликтүү бийликке да терең ыраазычылык билдиребиз, - деди ал.

Эскерте кетсек, былтыркы жылы Жалал-Абад облустук мамлекеттик телерадиокомпаниясы өзүнүн түзүлгөндүгүнүн 25 жылдык маарекесин белгилеген.