Жалал-Абад шаардык кеңешинен “Биримдик” көпчүлүк коалициясынан “Республика -Ата-Журт” партиясы чыгып кетти. Бул тууралуу аталган партиянын фракция лидери Тагай Чиллаев журналисттерге билдирди.

Жалал-Абад шаардык кеңешинин 2017-жылдын 16-январдагы 1-сессиясында “Өнүгүү-Прогресс”, “Республика - Ата-Журт”, жана “Ата-Журт” партияларынан шайланган шаардык кеңештин депутаттары “Биримдик” коалициясын түзүшүп, төраганын орун басарын шайлашкан болчу. Дал ошол коалициядан “Республика- Ата-Журт” партиясынан шайланган депутаттар өз каалосу менен чыгып кетишти.

Анын айтымына караганда, учурда шаардык кеңеш бир чечимге келе албай, шаардын иши токтоп, шаар бюджети бекитилбей, ишти аркага тартып олтурат.

- Мына ошого байланыштуу биз “Биримдик” коалициясынан чыгууну чечтик, максатыбыз - мэрликти же төрагалыкты алуу эмес, элдин көйгөйүн чечүү. Эгерде шаардын иши үчүн төрт партия биригип, биримдик түзүлсө, биз оппазицияда калуу үчүн да даярбыз, - дейт ал.

Эскерте кетсек, өткөн шайлоолордо “Республика-Ата-Журт” партиясынан шаардык кеңешке 3 депутат шайланган.