Казакстанда балкаштык укук коргоочу Санат Бөкеновдун үстүнөн козголгон кылмыш иши убактылуу токтотулду. Ал кыйноого кабылганын жарыялаган соң, бул боюнча териштирүү башталды.

Балкаштык укук коргоочу “жергиликтүү прокурорду жемкорлукка күнөөлөп, жалган маалымат берген” деген айып менен жарым жылдан бери камакта отурат.

19-январда сот жараяны болуп, 58 жаштагы Санат Бөкенов абакта кыйноого кабылганын айткан. Буга байланыштуу мамлекеттик айыптоочу соттон Букеновго карата кылмыш ишин убактылуу токтотууну сураган. Прокурор өтүнүчүн кыйноо жөнүндөгү арыз боюнча тергөөчүнүн үстүнөн кылмыш иши козголгону менен түшүндүрдү. Бирок бул иш боюнча акыркы процессуалдык чечим кабыл алына элек. Учурда Бөкеновго карата кыйноонун кандай түрү колдонулганы аныкталып жатат.

Камактагы укук коргоочу сотко бир күн калганда "Азаттыктын" казак кызматына кыйноолор моралдык зыян алып келип, ден соолугу начарлаганын билдирген. Камерадагы адам чыдагыс жагдай, туугандары менен көрүшүү мүмкүндүгүнүн жоктугу – азапка тете экенин айткан. Ал мындан тышкары камакта жаткан маалда жүрөгү жана бөйрөгү ооруп, 13 килограммга арыктаганын кошумчалаган.

Укук коргоочу үйүндө мыйзамсыз тинтүү жүргөнүн, жеке буюмдары менен кошо документтери, иликтөө материалдары конфискацияланганын маалымдаган.

Бөкенов кыйноолор боюнча маалымат бергендигине байланыштуу өз өмүрүнүн коопсуздугуна кабатыр болуп жатканын билдирген. Буга байланыштуу ал соттун чечими менен жеке камерада кармалмай болду.