Жалал-Абад шаарында Кыргыз Республикасынын өкмөтүнүн дин иштери боюнча комиссиясынын түштүк аймактык башкармалыгынын уюштуруусунда Кыргызстандагы дин таануу жана диний билим берүүнү реформалоо концепциясынын долбоору боюнча кеңешме жыйын болуп өттү. Бул тууралуу КР дин иштери боюнча мамлекеттик комитетинин аналитика бөлүмүнүн жетекчиси Гүлназ Исаева билдирди.

Анын айтымында, бул концепция өткөн жылы түзүлүп, ага карата атайын жумушчу топ куралып, ушул багытта иш алып барылууда.

-Ал эми бүгүнкү жыйындын күн тартибине эки маселе коюлган. Биринчиси, дин таануу билим берүүсү, ал эми экинчиси - диний билим берүү багыттарында. Жыйынга Жалал-Абад облусундагы дин кызматкерлери жана шаардын мектеп мугалимдери катышты. Анда алар менен бүгүнкү күндөгү жаштарыбыз арасында дин таануу маданиятын жогорулатууну талкуулашты. Мындай жыйындарды өткөрүүдөгү негизги эле максат мектептерде, жогорку окуу жайлардагы студенттердин жана окуучулардын арасында диний билим берүү жана аны жогорулатуу болуп саналат. Мектеп окуучулары үчүн алдыда дин таануу сабагын киргизүү багытында даярдыктар жүрүүдө дейт,- ал.

Эскерте кетсек, 2016-жылдын сентябрь айынан тарта Жалал-Абад шаарындагы №4 мектеп-гимназиясында пилоттук негизде балдарга диний түшүнүк берүү сабактары киргизилген.