Жалал-Абад шаарынын мэри Салайдин Авазов мамлекетке сиңирген өзгөчө эмгеги үчүн Кыргыз Республикасынын Өкмөтүнүн Ардак Грамотасы менен сыйланды. Бул тууралуу шаар мериясынан маалымдашты.

Кыргыз Республикасынын Өкмөтүнүн Жалал-Абад облусундагы ыйгарым укуктуу өкүлчүлүгүндөгү жыл жыйынтыгын караган коллегияга катышкан КР вице-премьер-министри Жеңиш Разаков Өкмөттүн Ардак Грамотасын, Алкыш баракчаларын жана акчалай сыйлыктарды областун район-шаарларындагы өз ишин мыкты билген жетекчилерге, ар кайсы мекеме-ишканалардын алдыңкы кызматкерлерине тапшырды. Анын ичинде Жалал-Абад шаарынын мэри Салайдин Авазов да шаардын өнүгүшүнө сиңирген зор эмгеги үчүн Өкмөттүн Ардак Грамотасын алууга татыды.

Эскерте кетсек, Жалал-Абад шаарында акыркы эки жыл аралыгында инфраструктуралык жактан ири өзгөрүүлөр болуп, жергиликтүү бюджеттин эсебинен курулуш иштеринин көлөмү мурдагы жылдарга караганда 4-5 эсеге арткан.