2017-жылдын 24-январь күнү саат 19:00дөр чамасында Жалал-Абад шаарынын Чехов көчөсүндө жайгашкан “Айым” соода борборунун алдында, Жалал-Абад шаарынын Көк-Арт кичи шаарчасынын тургуну 45 жаштагы А.П. коомдук жайда мас абалында жүргөн жеринен Патрулдук милиция бөлүмүнүн кызматкерлери тарабынан кармалган.

Мас абалындагы атуулду текшерген учурда “АКС-74” ок атуучу куралына таандык 5,45 мм калибриндеги 34 даана ок жана “АКМ” ок атуучу куралына таандык 7,62 мм калибриндеги 4 даана октору табылып, калыстардын катышуусунда акт түзүлүп алынган. 

Кармалган А.П. аттуу адам Жалал-Абад шаардык ички иштер бөлүмүнүн, тергөө бөлүмүнө алынып келинип, күбөлөрдүн катышуусунда суракка алынган учурда, шектүү мындан сырткары Жалал-Абад шаарынын аймагында катылган дагы ок-дарылары бар экендигин айткан. А.П.нын сөзү боюнча аталган дарекке Жалал-Абад ОИИБнын ыкчам тергөө тобу барып текшерген учурда, даараткананын ичиндеги өзүнчө бөлмөнүн ичинен 5,45 мм калибрдүү “АКС-74” үлгүсүндөгү ок атуучу куралынын 614 даана ал эми 7,62 мм калибрдүү “АКМ” ок атуучу куралынын 11 даана октору, ак капка оролуп турган жеринен алынган. Жалпы 5,45 мм калибриндеги 648 даана жана 7,62 мм калибриндеги 15 даана ок-дарылары алынган. 

Бул фактынын негизинде кылмыш иши козголуп,учурда тергөө амалдары жүргүзүлүүдө.

Жалал-Абад ОИИБнын басма сөз кызматы.