Кечээ Актау шаарында Oil Construction Company (OCC) мунайсервис компаниясынын жетекчисинин Каламкас кенинде иштеген 28 кызматкерине карата жазган доо арызы каралууда. Алар Көз карандысыз кесиптик кошуундар конфедерациясынын жабылышына каршы нааразылыгын билдирип, ачкачылык акциясына катышып жатышкан.

28 жоопкердин сегизи ачкачылык акциясына байланыштуу үчүнчү жолу административдик жоопко тартылып жатышат. Ишкана мунайчылардын аракетин мыйзамсыз деп таап, акция маалында келтирилген чыгымдар үчүн жумушчулардан 3 миллион тенгеден ашык акча (9 миң долларга жакын) өндүрүп берүүнү талап кылууда.

Жүздөгөн мунайчылардын катышуусундагы ачкачылык акциясы 5-январда башталган. Нааразылык акциясына Каламкас жана Жетыбай мунай кендериндеги жумушчулар да кошулушкан. Өткөн аптада акция катышуучуларына карата кылмыш иши козголуп, акциянын өзү сот тарабынан мыйзамсыз деп табылгандан кийин жергиликтүү бийликтин талабы менен ачкачылык токтогон. Компания өкүлү билдиргендей, жоопкерлер башка жумушчуларды «ачкачылыкка катышууга үгүттөшкөн».

Бирок мунайчылар ал билдирүүлөрдү четке кагышып, ишкананын 270тен ашык кызматкери акцияга өз ыктыяры менен катышып жатканын билдиришүүдө.

21-январда Астана соту OCC жумушчуларынын кесиптик кошуун башчысы Амин Елеусинов менен кошуундун эмгек боюнча инспектору Нурбек Кушакбаевди камакка алууга санкция берип, алар эки айга камалышкан. Ачкачылык акциясынын катышуучулары жыл башында жабылган Казакстандын Көз карандысыз кесиптик кошуун конфедерациясын калыбына келтирүүнү талап кылып жатышкан.