Жалал-Абад шаарынын мэриясы 2016-жылы үзүрлүү эмгектен жамааттарды жана кызматкерлерди 22 номинация менен аныктап, аларга сыйлыктарды тапшырды. Бул тууралуу шаар мэриясынын басма сөз кызматы билдирди.

Алынган маалыматка ылайык, “Жылдын мыкты муниципалдык мекемеси” номинациясы боюнча “Жалал-Абад тазалык” ишканасы, “Жылдын мыкты соода түйүнү” номинациясы боюнча “Келечек” соода борбору, “Жылдын мыкты банкы” номинациясы боюнча “Азия банкы”, “Жылдын мыкты инвестору” номинациясы боюнча “Медлайн” медициналык борбору жана башкалар мыкты деп табылышты.

Андан сырткары да, шаар мэриясы Жаңы жылдык кооздоп-жасалгалоо боюнча уюштурулган конкурстун жыйынтыгын чыгарып, айрым ишканаларды мыкты деп тапты. Алардын катарында шаар борборунан орун алган “Мөл-Мөл” мейманкана-эс алуу комлпекси, Жалал-Абад мамлекеттик университети, “Демирбанк”, шаардык маданият сарайы, шаардык архитектура жана курулуш бөлүмү бар.

Бардык сыйланган тараптарды жана кызматкерлерди шаар мэри Салайдин Авазов куттуктап, иштерине ийгиликтерди каалады.