Жалал-Абад ОИИБнын башчысынын буйругунун негизинде "Разбойник" аталыштагы ыкчам иликтөө жана профилактикалык иш-чара уюштурулуп, операция учурунда кылмыштуу топтун (КТ) мүчөлөрү Кочкор-Ата шаарында самса бышырып сатып тиричилик кылган жаранды карактап акчасын алгандыгы аныкталат.

Үстүбүздөгү жылдын 21-декабрь күнү саат 11:30 чамаларында самсачыны "Зама", "Акмал" аттуу бей тааныш балдар Кочкор-Ата шаарынын түндүк тарабында жайгашкан эски санаториянын багына алып чыгышып, ал жерде пистолет такап, уруп, тебишип, коркутуп 16 000 сом акчасын алып, дагы "5000 АКШ доллар бересин" деп коркутуп акча талап кылышкан.

Жасалган каракчылык фактысы боюнча кылмыш иши козголгон.
Алынган ыкчам маалыматтын негизинде бул кылмышка Акмал жана анын шериги Зама шектүү катары кармалып убактылуу кармоо изоляторуна киргизилди.

“Аталган кылмышка шектүү 2 атуул уюшкан кылмыштуу тобунун мүчөсү катары ИИМде каттоодо турат. Уюшулган кылмышкерлер тобуна жана анын лидерлерине каржылаган каналдарын табуу жана облустун аймагында уюшулган кылмыштуу топтун идеяларын колдогон, оперативдик кызыгуу жараткан жарандарды аныктоо үчүн тапшырмалар берилип оперативдик иш чаралар улантылууда”, - деп билдирет Жалал-Абад ОИИБнын басма сөз кызматы.