Бүгүн, 23-январь күнү Жалал-Абад шаарынын мэриясынын аткаруу комитетинин жыл жыйынтыгын чыгарган жыйында Билим берүү жана маданият кызматкерлеринин кесиптик кошундарынын облустук комитети тарабынын шаар мэри Салайдин Авазовго “Жылдын Бакайы” номинациясы боюнча диплом тапшырылып, үстүнө чепкен жабылды. Бул тууралуу шаардык мэриянын басма сөз кызматы билдирди.

Алынган маалыматка караганда, жыл жыйынтыгын чыгарган жыйын башталарда кесиптик кошундардын тийиштүү профилдик комитетинин өкүлдөрү акыркы эки жыл аралыгында Жалал-Абад шаарында инфраструктуралык ири өзгөрүүлөр болуп жатканын, бул иште шаар жетекчисинин уюштуруучу зор эмгегин баса белгилешип, облустук комитет тарабынан жыл жыйынтыгында мыктыларды тандоо иштери жүргөнүн, анда шаар мэри Салайдин Авазовду “Жылдын Бакайы” номинациясы боюнча тандалып алынганын билдиришти.

“Ошондой эле шаар калкына жана шаар жетекчисине 2017-жылдагы жакшы ийгиликтерди каалашты. Шаар мэри өз кезегинде профилдик комитеттин өкүлдөрүнө ыраазылык билдирип, шаар жана шаар калкы үчүн дагы да көптөгөн долбоорлор түзүлгөндүгүн, алар сөзсүз ишке ашырыла турганын билдирди”, - деп билдирет шаар мэриясынын басма сөз кызматы.