Орусиялык «Мемориал» укук коргоо уюму жаңы баяндамасында эмгек миграциясы Тажикстанда калган мигранттардын балдарына терс таасирин тийгизип жатканын белгилөөдө.

«Тажикстанда калган эмгек мигранттардын балдары ата-энелерин көп жылдап көрүшпөйт, көпчүлүк учурда туугандарынын курмандыгына айланышат, мектепти ташташат, кыйноолорго кабылышат, сексуалдык зомбулук көрүшөт», - дешүүдө укук коргоочулар.

Уюмдун маалыматы боюнча өзгөчө кыздар эрте турмушка чыгуу, үй-бүлөлүк зомбулук, мектепти таштоо сыяктуу көрүнүштөргө туш болушууда.

«Мемориал» тажик бийлигине эмгек мигранттардын балдарына көңүл бурууга, укуктарын коргоого жана Орусиядан кармоолор учурунда балдарды ата-энесинен ажыратуу сыяктуу тажрыйбаны токтоосуз түрдө токтотууну, Умарали Назаровдун өлүмүн адилетүү иликтөөнү улантууну талап кылууга кеңеш берет.

Сентябрда БУУнун Балдар укуктары боюнча комитетинин 76-сессиясы өтөт. «Мемориал» миграциялык маселелерге байланыштуу баяндамасын комитетке жөнөттү. Тажикстан Балдар укугу боюнча конфенциянын аткарылышы тууралуу 6-10-февраль аралыгында алдын-ала отчет берет.