Жалал-Абад шаарында жерге жайгаштыруу жана кыймылсыз мүлккө укуктарды каттоо жаатында 2016-жылы 7 миллион 942,4 миң сомдук жумуштар аткарылган. Бул мурдагы жылга караганда кыйла көптүк кылат. Бул тууралуу шаардык жерге жайгаштыруу жана кыймылсыз мүлккө укуктарды каттоо башкармасынын жетекчиси Алмамбет Осмонов билдирди.

Анын айтымында, жыл башында ушундай кызмат көрсөтүү көлөмү 7 миллион 400 миң сом деп белгиленсе, жыл аягында ага салыштырмалуу 7 пайыз өсүш менен чыгышты.

- Биздеги жерге жайгаштыруу бөлүмүндө 2015-жыл ичинде 1630 кызмат көрсөтүү иши жүргүзүлгөн болсо, 2016-жылдын ичинде 1332 кызмат көрсөтүү үчүн арыз түшүп, кардарлардын суроо-талаптары толугу менен канааттандырылган. Шаардыктарды тейлөө жаңы деңгээлге көтөрүлүп, аларга бардык ыңгайлуу шарттар түзүлдү, - дейт ал.

Эскерте кетсек, Жалал-Абад шаарынын административдик чегинде бардыгы болуп 8821 гектар жер бар, анын ичинен 1186 гектары айдоо, 75 гектары көп жылдык бак-дарактар, 496 гектары чөп чабынды, 2964 гектары жайыт жерлер, 1076 гектары үй алдыдагы огороддор, 933 гектары токойлу жерлер, 241 гектары бадалдар, 1850 гектары башка жерлер эсептелет. Ал эми шаар боюнча 27988 кыймылсыз мүлк бирдиги бар.