Кечээ, 18-январда КР Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев Аксы районунун Жерге-Тал айыл аймагына караштуу Көлдө-Сайдагы асфальт заводунун иши менен жеринде таанышып кайтты. Бул тууралуу өкүлдүн басма сөз катчысы билдирди.

Анын берген маалыматына караганда, өткөн жылы Япония өлкөсүнүн грантынын эсебинен 288 млн. 288 миң сомго курулган асфальт чыгаруучу жаңы завод өз ишин баштаган. Былтыркы жылы райондогу 6 км жолго төшөлгөн сапаттуу асфальтты ушул заводдун жумушчулары чыгарып беришкен.

- Япония өлкөсүнүн грантынын эсебинен курулган асфальт чыгаруучу завод былтыр кечирээк ишке киргизилип калгандыктан асфальтты кеңири чыгаруу мүмкүнчүгүгүнө жетишпей калганбыз. Жаз айынын келиши менен ишибизди толук кандуу баштап, завод өз кубаттуулугунда иштей баштайт. Бизде күнүнө 250 тонна сапаттуу асфальт чыгаруу мүмкүнчүлүгү бар. Бардык иштер автоматташтырылган. Заводдун бардык жабдуулары менен агрегаттары япония өлкөсүнүн өндүрүшүнөн чыгарылган. Мындан сырткары асфальт ташуучу “Исуси” үлгүсүндөгү 3 самосвал,  экскаватор, погрузчик, техникалык тейлөө автомашинасы жана  автогрейдерибиз бар. Бизде иштей турган бардык техникалар япониядан чыгарылган. Жаз чыгары менен асфальт чыгаруу иштерин жандуу алып барууну мерчемдеп жатабыз,- дейт асфальт чыгаруу заводунун директору Алмазбек Муратбеков.

“Жалпы жонунан  асфальт заводунда 12 жумушчу эмектенишет. Алардын орточо эмгек маяналары 10 миң сомдон жогору. Аксыдагы асфальт чыгаруучу завод Таш-Көмүр шаарынын, Аксы, Ала-Бука жана Чаткал райондорунун асфальтка болгон керектөөлөрүн толук камсыз кылуу мүмкүнчүлүгүнө ээ”, - дейт өкүлдүн басма сөз катчысы Жолдошбай Осмонов.