“Биз жаш активисттер “Элдик парламент” дегендин тизмесинде жүргөндөрдүн көбүн  жакшы тааныбайт экенбиз”, - дейт Жалал-Абад мамлекеттик университетинин студенти Бектур Токтоноев Жалал-Абадда өткөн маалымат жыйында.

Анын айтымына караганда, “Элдик парламентте” жүргөндөрдүн баары бир мезгилде мамлекеттик чоң-чоң кызматтарда иштегендер. Эми алар кайдан-жайдан эле пайда боло калышып, активдеше башташты.

- Жаштар тынчтыкты гана каалап жатабыз. Бийликти күч менен кулатып, 2 жолу революцияны баштан өткөрдүк. Элдин тандоосу аркылуу шайлоо жолу менен бийлик алмашса, Кыргызстанда стабилдүүлүк, тынчтык болот. Оппозиция өзүнүн программасы менен чыгып, жакшы чакырыктар менен элдин ишеничин арттырсын. Эл өзү тандап шайлагандан кийин, аларга эч кандай жолтоо жок. Биз үчүнчү ыңкылапка, көтөрүлүшкө жол бербейбиз деген максат менен маалымат жыйынга келдик, - дейт Б.Токтоноев.

Ал эми Сузак районунун Ленин айыл өкмөтүнүн тургуну Абдыманап Аширбековдун айтымында, аны “Элдик парламент” эч кандай себеби жок эле өздөрүнүн тизмесине кошуп алган экен. “Мени эч кандай себеби жок эле өздөрүнүн тизмесине кошуп алышыптыр. Муну мен жакында билдим. Ушул кезге чейин мен эч кандай саясий күчтөр менен байланышкан эмесмин”, - деди А.Аширбеков.

“Көк-Арт Инфо” Маалымат борбору.